ទៅលេងភ្នំកំពង់ត្រាច ទៅលេងកន្លែងណាខ្លះ?

ភ្នំកំពង់ត្រាច គឺជារមនីយ៍ដ្ឋានធម្មជាតិមួយនៃខេត្តកំពតដែលមានភាពល្បីល្បាញជាងគេ ។ ភ្នំនេះជាភ្នំដែលមានថ្មកំបោរដុះដុំៗស្រួចចុងតៗគ្នាគួរអោយគយគន់ប្រៀបដូចជាគំនូរ ភ្នំនេះដែរមានរូងល្អាងធំតូចជាច្រើនលាក់កំបាំងជុំវិញភ្នំ ។

ជ្រុងម្ខាងនៃភ្នំកំពង់ត្រាច មើលពីកំពូលភ្នំម្ខាង

ជាភ្នំមួយស្ថិតនៅក្នុងឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត ចំងាយប្រមាណ ៤២ គីឡូម៉ែត្រ ពីក្រុងកំពត និងប្រមាណ ១៣៥ គីឡូម៉ែត្រ ពីរាជធានីភ្នំពេញ ។ ដើម្បីទៅដល់រមណីយដ្ឋានភ្នំកំពង់ត្រាចបាន យើងត្រូវធ្វើដំណើរដោយចេញពីរាជធានីភ្នំពេញតាមផ្លូវជាតិលេខ ៣ រហូតដល់ផ្លូវបំបែកគុស ហើយបន្តដំណើរតាមផ្លូវជាតិលេខ ៣១ ដោយឆ្លងកាត់ស្រុកអង្គរជ័យ ស្រុកបន្ទាយមាស ។ នៅពេលដែលយើងទៅដល់ទីរួមស្រុកកំពង់ត្រាច យើងនឹងឃើញស្លាកបង្ហាញរបស់ក្រសួងទេសចរណ៍នៅខាងស្តាំដៃដែលស្ថិតនៅទល់មុខនឹងធនាគារ អេស៊ីលីដា សាខាស្រុកកំពង់ត្រាច សរសេរថារមណីយដ្ឋានភ្នំកំពង់ត្រាច ។ យើងធ្វើដំណើរតាមផ្លូវដីបន្តចំងាយប្រមាណ២គីឡូម៉ែត្របន្ថែមទៀត នឹងដល់ទីអារាមវត្តគិរីសិលា ដែលស្ថិតនៅជើងភ្នំកំពង់ត្រាចតែម្តង ។

ទេសភាពមើលពីលើកំពូលភ្នំកំពង់ត្រាច

អ្នកទៅលេងទីនោះ អាចកំសាន្តបានច្រើនកន្លែង បើយើងចូលតាមវត្តគិរីសិលា យើងនឹងដើរឆ្លងរូងល្អាងដំបូងដែលមានទឹកតក់បង្កើតជារូបផ្សេងៗដូចជារូបដំរីជាដើម បើលោកអ្នកទៅលេងនៅខែវស្សា គេឃើញនៅតាមរូងមានទឹកដកត្រៀបត្រា យើងអាចដើរកាត់បានដោយស្ពានឆ្លងទៅកន្លែងទីមួយនៃប្រហោងភ្នំ ។

រូងប្រហោងកណ្តាលមានទំហំធំ ហើយមានល្អាងតូចធំព័ទ្ធជុំវិញ

មើលឃើញថ្មដុះដាច់ពីក្រោមគួរអោយស្ងប់ស្ងែង

នៅទីនេះរង្វង់ប្រហោងនេះ បើអ្នកបានទៅលេងចំពេលថ្ងៃត្រង់ចាំងចំពីលើ ហើយមានផ្សែងហោះហើរពេញនោះ អ្នកនឹងឃើញភាពអស្ចារ្យមួយ នោះគឺពន្លឺចាំងឆ្លុះតាមមែកឈើចុះមក ជាសសៃជះដូចពិលឆ្លុះគ្រប់កន្លែង មើលហើយគួរអោយគយគន់ និងចង់ថតទុកជាអនុស្សាវរីយ៍ ។

Sun Ray ទិដ្ឋភាពនៃភ្នំកំពង់ត្រាចពេលថ្ងៃត្រង់

បរិវេនចន្លោះភ្នំ

ល្អាងផ្សេងៗនៅជុំវិញចន្លោះប្រហោងភ្នំ

ល្អាងតូចមួយទៀត

ដើរតាមល្អាងអាចឆ្លងទៅម្ខាងនៃភ្នំម្ខាងទៀតមានទេសភាពត្រកាល មានតូបកាហ្វេ តូបលក់ទឹកផ្លែឈើចាំអបដោយដើមផ្កា ដើមហូបផ្លែដាំអបផ្លូវ និងជួរភ្នំវែងអបដោយវាលស្រែខៀវស្រងាត់ ហើយមានរទេះសេះចាំដឹកលោកអ្នកត្រឡប់ទៅកន្លែងដើម រឺអាចជួលពួកគាត់ដឹងកំសាន្តជុំវិញភ្នំមើលទេសភាពផេ្សងបាន។

ទេសភាពជំហៀងខាងកើតពេលដើរឆ្លងរូងភ្នំមកម្ខាង

រទេះសេះចាំនាំអ្នកទេសចរណ៍កំសាន្តជុំវិញភ្នំ

បន្ទាប់អ្នកអាចឡើងទៅលេងកំពូលភ្នំមើលទេសភាពដ៏ត្រកាលនៅជុំវិញភ្នំបាន មានក្មេងនៅទីនោះនាំផ្លូវឡើងទៅលេង កុំភ្លេចស្ពាយទឹកយកទៅញុាំផង ការឡើងភ្នំមិនខ្ពស់ប៉ុន្មានទេ តែត្រូវតោងថ្ម និងវល្លិ័ដោយកន្លែង ថ្មមានសភាពស្រួចៗ បើចង់ឡើងភ្នំគួរត្រៀមជាមុនដូចជាស្បែកជើងឡើងភ្នំ ខោមានភាពយឺតមិនតឹង ទឹក អាវដៃវែងការពារកម្តៅថ្ងៃ មួកជាដើម ដើម្បីសម្រួលដល់ការឡើងទៅដោយសុវត្ថិភាព។

ទេសភាពមើលពីលើកំពូលភ្នំ

កំពូលថ្មស្រួលនេះ យើងអាចឡើងថតរូបបាន

ជ្រុងម្ខាងវត្ត ក្រោយចុះពីលើភ្នំមកអ្នកនឹងជួបជណ្តើរចុះ និងល្អាងមួយទៀត

នៅម្ខាងទៀតនៃភ្នំ មានខ្សែរថភ្លើងដ៏វែងចេញពីភ្នំពេញមកកាត់ភ្នំដំរី និងភ្នំកំពង់ត្រាច។ ជ្រុងនោះដែរមានល្អាងជាច្រើនទៀតដូចល្អាងព្រះច័ន្ទ ល្អាងព្រះអាទិត្យ ល្អាងឆ្លុះភ្នំ ល្អាងតាសច្ច... ។ ដែលជាទីដ៏ពេញនិយមរបស់យុវវ័យ ទៅលេង ពិសេសនៅរដូវវស្សា ល្អាងព្រះច័ន្ទមានទឹកដកខៀវស្រងាត់ថ្លាឆ្លុះដល់បាត មានទឹកត្រជាក់គួរអោយចង់ងូតទឹកលេង ។

ល្អាងព្រះច័ន្ទខែវស្សា មានទឹកដកអាចហែលទឹកលេងបាន

រូងតូចមួយរបស់អ្នកសច្ច

ល្អាងព្រះអាទិត្យមានប្រហោងមួយឆ្លុះពន្លឺភ្លឺពេញល្អាង

ក្នុងល្អាងព្រះអាទិត្យមានថ្មដុះចុះរាងដូចផ្កាស្លា និងរូបផ្សេងៗ

ឡើងតាមកាំជណ្តើររាងចោទបន្តិចអ្នកនឹងឃើញរូងមួយធំមានប្រហោងឆ្លុះពីម្ខាងទៅម្ខាងនៃភ្នំ ទីនោះមានទេសភាពត្រកាលគួរអោយចាប់ចិត្ត អាចមើលឃើញភ្នំដំរី និងផ្លូវរថភ្លើងផងដែរ ក្នុងនោះមានរូងល្អាងធំ ព្រមទាំងមានរ៉ែថ្មដុះផងដែរ ។ រូងល្អាងមានសភាពងងឹត អ្នកអាចយកពិលតាមខ្លួនដើម្បីឆ្លុះមើលបាន ។